बाढीपीडितका लागि सहयोग गरेको भन्दै पोस्ट, प्रहरीको अनुसन्धानपछि खुल्यो यस्तो पोल

मेगा खबर संवाददाता

१४, भाद्र २०८३

214

बाढीपीडितका लागि सहयोग गरेको भन्दै पोस्ट, प्रहरीको अनुसन्धानपछि खुल्यो यस्तो पोल

बाढी प्रभावितका लागि सहयोग गरेको भन्दै सामाजिक सञ्जालमा एउटा भौचर पोस्ट गरेपछि रामेछापका एक युवक प्रहरीको फन्दामा परेका छन् ।

आफूले राहत कोषमा ठूलो रकम सहयोग गरेको दाबी गर्दै सामाजिक सञ्जालमा पोस्ट गर्ने युवकले त्यसैमार्फत रकमसमेत उठाउन खोजेको प्रहरीको भनाइ छ ।

पक्राउ पर्नेमा गोकुलगंगा गाउँपालिका–२ ठोसेका ३२ वर्षीय भगवान कार्की रहेका छन् । उनलाई रामेछाप प्रहरीले पक्राउ गरेको हो । जिल्ला प्रहरी कार्यालय रामेछापका सूचना अधिकारी प्रहरी निरीक्षक कमल राउतका अनुसार कार्कीले प्रधानमन्त्री दैवी प्रकोप उद्धार कोषमा आफूले १ लाख २० हजार रुपैयाँ सहयोग गरेको भन्दै सामाजिक सञ्जालमा भौचर पोस्ट गरेका थिए ।

तर प्रहरीले अनुसन्धान गर्दै जाँदा उक्त भौचर वास्तविक नभएको खुलेको छ । प्रहरीका अनुसार कार्कीले च्याटजिपिटी प्रयोग गरेर नक्कली बैंक स्टेटमेन्ट तयार पारी आफूले राहत कोषमा रकम जम्मा गरेको देखाएका थिए ।

यतिमात्र होइन, उनले आफूले सहयोग गरेको भन्दै सामाजिक सञ्जालमा आफ्नै क्यूआर कोडसमेत पोस्ट गरेको प्रहरीले जनाएको छ । त्यसबाट रकम संकलन गरी ठगी गर्ने उद्देश्य रहेको प्रहरीको प्रारम्भिक अनुसन्धानबाट खुलेको बताइएको छ ।

घटनाबारे थप अनुसन्धान भइरहेको जिल्ला प्रहरी कार्यालय रामेछापले जनाएको छ ।

आइतवार, भाद्र १४ २०८३११:५५:२२

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।