मृतकको नाम मतदाता सूचीबाट हटाउन आयोगको आग्रह

मेगा खबर संवाददाता

२, भाद्र २०८३

469

मृतकको नाम मतदाता सूचीबाट हटाउन आयोगको आग्रह

काठमाडौँ, निर्वाचन आयोगले मृत्यु भएका व्यक्तिको नाम मतदाता नामावलीबाट हटाउन परिवारका सदस्य तथा सम्बन्धित व्यक्तिलाई आग्रह गरेको छ ।

आयोगका सहसचिव नारायणप्रसाद भट्टराईले विज्ञप्ति जारी गर्दै मृतकको नाम समयमै हटाउन आग्रह गरेका हुन् ।

मृत्यु भएका मतदाताको नाम हटाउन मृत्युदर्ता प्रमाणपत्रसहित सम्बन्धित निर्वाचन कार्यालयमा जानकारी गराउन सकिने आयोगले जनाएको छ । यस्तो सूचना परिवारका सदस्य वा अन्य व्यक्तिले पनि दिन सक्नेछन् ।

आयोगले मतदाता नामावलीलाई नियमित रूपमा अद्यावधिक गर्दै आएको छ । नामावली शुद्ध र विश्वसनीय राख्नु निर्वाचनको निष्पक्षताका लागि महत्वपूर्ण हुने आयोगको भनाइ छ ।

अघिल्लो निर्वाचनपछि गत चैत २२ गतेदेखि मतदाता नामावली दर्ता तथा अद्यावधिकको काम निरन्तर भइरहेको छ ।

राष्ट्रिय परिचयपत्र भएका नागरिकले अनलाइनबाटै मतदाता नाम दर्ता गर्न सक्ने व्यवस्था छ । परिचयपत्र नभएका नागरिकले भने अनलाइन फारम भरेपछि फोटो र औँठाछापसहितको विवरण दिन निर्वाचन कार्यालयमा उपस्थित हुनुपर्नेछ ।

मतदाता नामावलीमा नाम, थर वा ठेगाना सच्याउन पनि अनलाइनबाट आवेदन दिन सकिन्छ । एउटै वडाभित्र मतदानस्थल परिवर्तन गर्न र दोहोरो नाम हटाउन पनि यही प्रक्रियाबाट निवेदन दिन सकिने आयोगले जनाएको छ ।

आयोगले मतदाता नामावली अद्यावधिक राख्न सम्बन्धित सबैलाई सहयोग गर्न आग्रह गरेको छ ।

मंगलवार, भाद्र २ २०८३०१:०७:२३

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।