कृष्णभीरको पहिरोले ग्यासको हाहाकार, घण्टौँ लाइन बसेर पनि रित्तै फर्किँदै उपभोक्ता

मेगा खबर संवाददाता

१८, भाद्र २०८३

406

कृष्णभीरको पहिरोले ग्यासको हाहाकार, घण्टौँ लाइन बसेर पनि रित्तै फर्किँदै उपभोक्ता

काठमाडौँ, पृथ्वी राजमार्गको कृष्णभीरमा गएको पहिरोले राजधानीको जनजीवनमा प्रत्यक्ष असर देखिन थालेको छ । सडक अवरुद्ध भएपछि काठमाडौँ उपत्यकामा खाना पकाउने एलपी ग्याससहित अत्यावश्यक वस्तुको आपूर्ति प्रभावित हुँदा बिक्री केन्द्रहरूमा उपभोक्ताको भीड बढ्न थालेको छ ।

रसुवामा आएको बाढीका कारण सडक कटान र पहिरोको समस्या बढिरहेका बेला सङ्घीय राजधानी काठमाडौँ प्रवेश गर्ने मुख्य मार्ग पृथ्वी राजमार्ग अन्तर्गत धादिङको कृष्णभीरमा आइतबार पहिरो खसेपछि राजमार्ग पूर्ण रूपमा अवरुद्ध भएको हो ।

राजमार्ग अवरुद्ध हुँदा काठमाडौँतर्फ आउँदै गरेका ग्यास तथा पेट्रोलियम पदार्थ बोकेका सवारी साधन बाटोमै रोकिएका छन् । यसको प्रत्यक्ष असर उपत्यकाको ग्यास आपूर्तिमा परेको छ ।

सडकबाट ग्यासका गाडी राजधानी आउन नसकेपछि काठमाडौँका विभिन्न बिक्री केन्द्रमा उपभोक्ताको भीड बढेको छ । अनामनगरस्थित नेपाल ग्यासको आधिकारिक बिक्री केन्द्रमा मात्रै पाँच दिनदेखि ग्यास लिन सर्वसाधारणको लामो लाइन लागिरहेको छ ।

घण्टौँसम्म लाइनमा बसे पनि ग्यास नपाउने अवस्था रहेको उपभोक्ताको गुनासो छ । ग्यास आउने आशामा खाली सिलिन्डर बोकेर बिक्री केन्द्र पुगेका कतिपय उपभोक्ता लामो समय पर्खिएपछि पनि रित्तै घर फर्किन बाध्य भएका छन् ।

सडक कहिले खुल्छ र ग्यासको नियमित आपूर्ति कहिले सहज हुन्छ भन्ने टुंगो नलाग्दा उपभोक्तामा थप चिन्ता बढेको छ । राजधानीको मुख्य आपूर्ति मार्गमै अवरोध भएपछि यसको असर खाना पकाउने ग्यासमा मात्रै नभई पेट्रोलियम पदार्थ तथा अन्य अत्यावश्यक वस्तुको आपूर्तिमा समेत पर्न सक्ने देखिएको छ ।

बिहिवार, भाद्र १८ २०८३०१:०६:०२

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।