जलवायु कूटनीतिलाई नयाँ ढङ्गले अघि बढाउँदै सरकार, परराष्ट्रमा खुल्यो छुट्टै शाखा

मेगा खबर संवाददाता

४, आश्विन २०८३

जलवायु कूटनीतिलाई नयाँ ढङ्गले अघि बढाउँदै सरकार, परराष्ट्रमा खुल्यो छुट्टै शाखा

काठमाडौं, जलवायु परिवर्तन र वातावरण संरक्षणसम्बन्धी कूटनीतिक पहललाई थप प्रभावकारी बनाउन परराष्ट्र मन्त्रालयले पहिलोपटक वातावरण कूटनीति शाखा स्थापना गरेको छ ।

मन्त्रालयका अनुसार बढ्दो जलवायु परिवर्तन र त्यसबाट नेपालमा परिरहेको प्रभावलाई ध्यानमा राख्दै शाखा स्थापना गरिएको हो । सङ्गठन तथा व्यवस्थापन सर्वेक्षण (ओएन्डएम) का आधारमा संयुक्त राष्ट्रसंघ तथा विशिष्टीकृत संघसंस्था महाशाखाअन्तर्गत ‘आर्थिक, सामाजिक विकास तथा वातावरण कूटनीति शाखा’ रहने व्यवस्था गरिएको छ । शाखाको नेतृत्व उपसचिवले गर्नेछन् ।

नयाँ शाखाले जलवायु तथा वातावरणसम्बन्धी अन्तर्राष्ट्रिय कूटनीतिक पहलमा सहजीकरण गर्नुका साथै सम्बन्धित राष्ट्रिय निकायसँग समन्वय गर्नेछ ।

परराष्ट्रमन्त्री शिशिर खनालले जलवायु कूटनीतिलाई अन्तर्राष्ट्रिय सम्मेलनमा सहभागितामा मात्र सीमित नगरी दीर्घकालीन र संस्थागत प्राथमिकताका रूपमा अघि बढाउनुपर्ने बताएका छन् ।

उनका अनुसार नेपालले विभिन्न अन्तर्राष्ट्रिय मञ्चमा जलवायु कूटनीतिमा सक्रियता देखाउँदै आए पनि अब त्यसलाई थप व्यवस्थित र संस्थागत बनाउन आवश्यक छ ।

मन्त्री खनालले हाल शाखामार्फत काम अघि बढाइने र आवश्यकता तथा कार्यबोझ बढ्दै गए भविष्यमा यसको संस्थागत संरचना थप सुदृढ गर्न सकिने बताए। जलवायु परिवर्तन र विपद्सँग सम्बन्धित विषयमा मात्र नभई नियमित रूपमा जलवायु कूटनीतिका प्राथमिकता र पहल अघि बढाउनुपर्ने उनको भनाइ छ ।

आइतवार, आश्विन ४ २०८३०२:०१:५२

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।