गणेश चतुर्थीमा मन्दिरमा भक्तजनको भीड, बिहानैदेखि दर्शनार्थीको घुइँचो

मेगा खबर संवाददाता

३०, भाद्र २०८३

715

गणेश चतुर्थीमा मन्दिरमा भक्तजनको भीड, बिहानैदेखि दर्शनार्थीको घुइँचो

काठमाडौँ, विघ्नहर्ता तथा अग्रपूजाका देवता भगवान् गणेशको पूजा आराधना गर्न आज बिहानैदेखि काठमाडौँ उपत्यकासहित देशभरका गणेश मन्दिरमा भक्तजनको घुइँचो लागेको छ ।

भाद्र शुक्ल चतुर्थीका दिन भगवान् गणेशको जन्म भएको धार्मिक मान्यता अनुसार आज गणेश चतुर्थी मनाइँदैछ। यस अवसरमा अशोकविनायक, चन्द्रविनायक, सूर्यविनायक, कमलविनायक र कमलादी गणेशलगायतका मन्दिरमा विशेष पूजा तथा आराधना भइरहेको छ ।

धार्मिक मान्यताअनुसार शिव–पार्वतीका पुत्र गणेशलाई सबै धार्मिक तथा शुभ कार्यमा पहिलो पूजा गर्ने अधिकार प्राप्त छ। सुख, शान्ति र समृद्धिका साथै जीवनमा आउने बाधा–अड्चन हट्ने विश्वासका साथ भक्तजनले आज गणेशको पूजा गर्ने गर्छन् ।

धर्मशास्त्रविद्हरूका अनुसार भाद्र शुक्ल तृतीयाका दिन हरितालिका तीजको व्रत बसेका महिलाले चतुर्थीका दिन गणेशको पूजा गरी आफ्नो जीवनमा कुनै विघ्न नआओस् भन्ने कामना गर्ने परम्परा छ ।

आजको दिनलाई मङ्गल चतुर्थी पनि भनिन्छ। नेवार समुदायले यसलाई ‘चथा’ पर्वका रूपमा मनाउने गर्छ। यस अवसरमा बालबालिकालाई ‘छुस्यामुस्या’ बाँड्ने परम्परासमेत रहेको छ ।

गणेश चतुर्थीको अवसरमा देशभरका विभिन्न मन्दिरमा पूजा, प्रवचन तथा अन्य धार्मिक कार्यक्रम आयोजना भइरहेका छन् । राष्ट्रिय धर्मसभा नेपालले पनि विसं २०६५ देखि गणेश चतुर्थीका अवसरमा विभिन्न कार्यक्रम गर्दै आएको जनाएको छ ।

सभाका अनुसार यस वर्ष गणेश रथयात्रासमेत आजै आयोजना हुँदैछ । सामान्यतया भाद्र शुक्ल पञ्चमीका दिन गरिँदै आएको रथयात्रा यस वर्ष तिथिको विशेष संयोगका कारण चतुर्थीकै दिन परेको हो ।

मंगलवार, भाद्र ३० २०८३०७:३१:४१

मेगा खबर संवाददाता

मेगा खबर डट कम मेगा सञ्चार प्रा.लि.द्वारा सञ्चालित नेपाली भाषाको सम्पूर्ण अनलाइन समाचार पोर्टल हो । हामी सत्य, तथ्य र निश्पक्ष पत्रकारिताको मूल्य र मान्यतामा रहेर समाचार, शिक्षा, स्वास्थ्य, खेलकुद, मनोरञ्जन, साहित्य, कला, विकास निर्माण लगायत क्षेत्रको यथार्थ चित्रण उतार्ने प्रयासमा सदैव लागि रहने प्रण गर्दर्छौँ ।